İŞİD Fransadan niyə əl çəkmir...

Son bir neçə ildəki Paris terrorlarının ardıcıllığı və ilginc səbəbləri
Parisin mərkəzində şənbə günü axşam bıçaq hücumu törətmiş şübhəli şəxs 1997-ci ildə Rusiyanın Çeçenistan Respublikasında doğulmuş Fransa vətəndaşıdır. Bu barədə BBC-yə mənbələr bildirib. Media vasitələrində həmin adamın adı Həmzət Asimov kimi çəkilib.

Hücumçu bir kişini öldürdükdən və 4 nəfəri yaraladıqdan sonra polis tərəfindən güllələnib. İŞİD hücumun arxasında durduğunu bəyan edib. Fransa prezidenti Emmanuel Makron hadisədən sonra öz twitter səhifəsində Fransada növbəti dəfə qan töküldüyünü yazaraq vurğulayıb ki, “azadlıq düşmənlərinin qarşısından bir addım da geriçəkilmə olmayacaq”.

Son 3 ildə Fransada İŞİD qrupu tərəfindən qızışdırlan cihadçıların əlindən 230 adam ölüb. Strateq.az bildirir ki, Çeçenistanın rəhbəri Ramzan Kadırov bu terrorçunun adının Həsən Əzimov olduğunu və Çeçenistanda doğulduğunu etiraf edib. Lakin onun hərəkətinin məsuliyyətini Əzimovun üzərinə qoyub: “Həsən Əzimov Çeçenistanda doğulub, amma o, fransız cəmiyyətinə böyüyüb, onun baxışları və əqidəsi Fransada formalaşıb”.

İŞİD-in xəbər agentliyi 21 yaşlı çeçen Xamzat Azimovun terror təşkilatına sədaqət andı içməsi ilə bağlı videonu yayımlayıb. FaktXeber.com-un verdiyi məlumata görə, kadrlardan görünür ki, Azimov videokadrlarda əvvəlcə İŞİD liderinə and içir, sonra isə təşkilatın bütün dünyadakı tərəfdarlarına müraciət edir. Xüsusən Fransa, Almaniya və İngiltərədəki, həmçinin başqa ölkələrdəki həmfikirlərinə müraciət edərək İŞİD-in nəzarətində olan ərazilərə köçməyə, bunu edə bilməyənlərə isə olduqları ölkədə qətliama çağırır. Qeyd edək ki, artıq Qroznıda Hamzat Azimovun qohumları istintaqa cəlb olunublar.

Azimovun ailəsi Fransaya 2002-ci ildə köçüb. Orada məktəbi bitirdikdən sonra tibb kollecinə daxil olub və ölənə kimi orada oxuyub. Xamzatın anası Parisdə qulluqçu işləyib, ailə hər il Çeçenistandakı qohumlarını ziyarət edib. Gənc qapalı həyat tərzi keçirib, az dostu olub. Asudə vaxtının çox hissəsində kompüter oyunları oynayırmış.

Bu arada İŞİD Fransada niyə terror hücumu həyata keçirdiyini açıqlayıb. “Yeni Müsavat” xatırladır ki, bu, İŞİD-in Fransada törətdiyi ilk irimiqyaslı terror hadisəsi deyil. Bundan öncə dəfərlərlə Paris küçələri qana bulanıb və İŞİD törətdiyi terroru hər dəfə boynuna alıb. Məsələn, 2016-cı ildə terror təşkilatı peyğəmbərin təhqirinə və Fransanın Suriyadakı hava hücumlarında iştirak etdiyinə görə terror aktlarının həyata keçirildiyini bəyan edib. Təşkilat hücumların Fransanın hazırkı siyasəti davam etdirdiyi müddətə qədər davam edəcəyini bildirib. Bu terror aktının isə onların Fransaya bir xəbərdarlıq mesaji olduğunu deyiblər.

İŞİD-ə yaxın saytlar terror aktını “Avropanın 11 sentyabrı” kimi şərh ediblər. Parisdə isə hücumu həyata keçirən terrorçulardan biri həbs edilərkən “Mən İŞİD-in üzvüyəm” deyə şüar səsləndirib.

2016-cı ildə Fransanı qana bulayan terror aktı nəticəsində polisin açıqladığı rəqəmlərə görə, 128 nəfərin öldüyü bildirilmişdi. Amma qeyri-rəsmi məlumatlarda ölü sayının 153 olduğu qeyd edilirdi. Həmin vaxt Fransada matəmə səbəb olan terror aktları “Bataclan” incəsənət mərkəzində və onun konsert zalında, həmçinin “Kamboca” restoranında, “Le Karilyon” və “Bellek Ekip” barlarında, “Les Halz” ticarət mərkəzində, Fransa və Almaniya arasında futbol üzrə yoldaşlıq matçının keçirildiyi yerlərdə baş verib.

Hücumdan sonra Rusiya da daxil olmaqla, bir çox dövlətlər Fransaya uçuşları təxirə salmaqla yanaşı, Fransada yerləşən səfirliklərin də təhükəsizlik tədbirlərini gücləndiriblər. Hətta Polşa hökuməti terror aktlarının baş vermə qorxusu ilə dövlət sərhədlərini miqrantların üzünə bağlayıb.

2017-ci ilin 9 avqustunda Fransanın paytaxtı Parisdə növbəti terror aktı baş verib. Şəhərin qərbindəki şəhərətrafı Levallois-Perretdə əsgərlərin üstünə maşın sürülüb. Levallois bələdiyyəsinin sədri hücum zamanı BMW markalı avtomobilin bölgədə səhər kazarmadan yeni çıxaraq sıra düzülüşündə olan əsgərləri hədəfə aldığını söyləyib. Həmin ilin iyun ayında məşhur “Champs Elysees” bulvarında bir maşın jandarm avtobusunu vurmuşdu. Hücum edən şəxs hadisə yerində ölmüşdü.

Yenə iyun ayında bir şübhəli şəxs məşhur Notre Dame Katedralı yaxınlğındakı polisə çəkiclə hücum etmişdi. Polis hücum edən şəxsə atəş açaraq onu dayandırmışdı.

“Champs Elysees”də həmin ilin aprel ayında bir polis silahla vurulmuşdu və bu hücumu İŞİD öz üzərinə götürmüşdü.

2018-ci ilin mart ayında Fransanın Treb şəhərində supermarketə hücum etmiş terrorçu öldürülüb. Bu barədə Fransanın daxili işlər naziri Jerar Kolon öz Twitter səhifəsində yazıb. O bildirib ki, insanları girov götürmüş terrorçu güllələnib. Danışıqlar nəticə vermədikdən sonra xüsusi təyinatlı dəstələr əməliyyat keçirib və terrorçu məhv edilib. Qeyd edək ki, hadisə zamanı 3 nəfər ölüb, daha bir neçə nəfər yaralanıb. Belə ki, məlumata görə, terrorçu Treb şəhərində silahlı hücum həyata keçirməzdən əvvəl bir sürücünü qətlə yetirib və onun maşınını qaçırıb. “O, ağ rəngli ”Opel" markalı avtomobilin sürücüsünə başından atəş açıb. Həmin maşında supermarketə yollanıb və daha iki nəfəri qətlə yetirib, bir qrup insanı girov saxlayıb", - deyə məlumatda qeyd olunur. Terror aktını törədən şəxsin Mərakeş vətəndaşı və radikal dini qruplaşmanın üzvü olduğu bildirilir. Məlumata görə, terrorçu bundan öncə Parisdə törədilmiş terror aktının əsas təşkilatçılarından olmuş şəxsin həbsdən azad edilməsini tələb kimi irəli sürüb.

Fransa İŞİD-ə qarşı NATO dəstəkli aparılan hava əməliyyatına ən böyük dəstəyi verən ölkələrdən biridir. Hava əməliyyatı zamanı IŞİD çox ciddi itki verib. Eyni zamanda Antalyada baş tutan zirvə də İŞİD-in gələcəyi üçün çox önəmlidir. Çünki buradan çıxan qərara əsasən, Amerika, Rusiya, AB, Çinin də İŞİD-dən qurtulmaq istədiyi üzə çıxıb. Bütün ayrı qütbləri bir araya gətirən İŞİD bunun fərqindədir. Bu səbəbdən də bütün dünyaya “Məni Suriyada vursanız da, mən ölkənizdə sizi vuraram” mesajını vermək istəyir.

Bu təşkilata qoşulanların çoxunun əsas funksiyası həm də canlı bomba olmaqdan ibarətdir. Təl-Əviv Universitetinin israilli professoru Ariel Merari 50-dən artıq canlı bomba barədə sosial araşdırma aparıb. Araşdırmada nə ortaq bir xarakter, nə də patoloji bir şəxsiyyət özəlliyi üzə çıxarılıb. Amma bütün bu qatillərdə ən önəmli oxşarlıq onların heç diqqət cəlb etməmələri olub. Ağla gələn sual isə “Onlar da sizin, bizim kimi insanlardırmı”dır. Xarici görünüş etibarilə elədir. Amma onların ortaq psixoloji durumu var: “Narsist” bir ruh halı, “uc nöqtələrdə yaşamağı sevməsi”, intihar öncəsi sindroma düşmələri...

Terror təşkilatları qurbanları seçən zaman sentimental, spontan qərarlar verməyi sevən, təsir altına düşən tiplərə üstünlük verirlər. Bundan başqa, onların cəmiyyətdə özlərinə yer tapa bilməyən tiplər olması arzuediləndir. Aksiyaçıların içində özünü fəda etmə, bir qəhrəman olma duyğusu ön plana çıxa bilir. Bundan başqa, ciddi şəkildə sosial təzyiqi də yaddan çıxarmaq olmaz. Təzyiqin ana xətti aşağıdakı kimidir: “Bunu həyata keçirmədiyin zaman qrupun içində hörmət görən bir insan kimi yaşama şansın yoxdur”.

Ekspertlər isə hesab edirlər ki, cihada yardım etmək adı ilə İŞİD-ə qoşulanlar bir qayda olaraq sonradan qıfıl altında qalır və ancaq oradakı hərbçi kişilərə qulluq edirlər. İŞİD-çilər qadınları, gənc qızları ora cəlb etmək üçün internet, xüsusən də sosial şəbəkələrin gücündən istifadə edirlər. Cəlbedici reklam rolikləri, yüksək keyfiyyətli videolar, kompüter oyunları bu məqsədlə hazırlanır, sosial şəbəkələrə buraxılır. Necə deyərlər, onlar internet çatından, forumdan çıxmadan insanların arzu-istəkləri ilə oynayır, onları öz tərəflərinə çəkirlər.

interposta.info