Gənc yazardan cəsarətli roman: Mən qaranlığam

Dəyərli oxucularım, sizə ilk romanımı təqdim edirəm.
Roman gerçək həyat hadisələri əsasında qələmə alınıb. Lakin süjet xəttini yazıçı təxəyyülüm ilə daha da zənginləşdirib, hiss- həyəcanı daha da artıran bədii təsvir və ifadə vasitələrindən də istifadə etmişəm. ‘’Mən qaranlığam’’ romanının qəhrəmanı yazıçı Nəsrin təkcə insanlardan deyil, özündən də tənhadır. Və elə ən dəhşətli məqam da bundan ibarətdir. Əsər boyu insan axtarışlarında dəfələrlə azan, lakin hər cəhdində uğursuzluğa düçar olan qadın obrazı bəzi məqamlarda xarakteri və davranışları ilə öz xarakterimi əks etdirsə də, romandakı hadisələr tamamilə öz həyatımın təzahürü deyil. Romanda həyat təcrübəsi, insanlar arasında olan səthi münasibət, yadlaşmanın dərinləşməsi, artan nifrət, azalan sevgi təzadları poetik və obrazlı dillə qələmə alınmışdır. Fikrimcə, əsəri gənc bir qadın tərəfindən yazılan cəsarətli roman hesab etmək olar. Yazıçı fikirlərinin dərin qatlarına xüsusən açıq-saçıq səhnələrdə enmiş, qəhrəmanın duyğularını bütün çılpaqlığı ilə, olduğu kimi təqdim etmişəm.
Nəsrin həyatın bütün çətinlikləri ilə təkbaşına mübarizə aparan güclü qadın obrazı olmaqla bərabər, həm də ehtirası, çılğın temperamenti ilə hadisələrin gedişatında maraq doğurur, çox vaxt qəhqəhələri ilə dünyanı coşduran qadın özü ilə dərdləşəndə daha yetkin, müdrik və ağıllı olur. Saf və məsum olsa da sadəlövh deyil, ürəyinin səsi ilə məğlub olduqdan sonra insanlardan uzaq düşür, laqeyd və bivec, soyuqqanlı görünür. Həyat təcrübəsi artdıqca beyni ilə hərəkət edir, yaşadığı dramatik həyata baxmayaraq psixoloji vəziyyətini tənzimləyir, təslim olmur.
Yazıçı kimi qəhrəmanımın səmimiyyətinə, təbiiliyinə görə onu sevir, bu obrazı xüsusi rəğbətlə yaratmışam. Romanın süjet xətti özünü Əminə adı ilə təqdim edən yazıçı Nəsrinin sevdiyi kişi Elmirin həyat yoldaşı saf, sadəlövh qadın Xəyaləyə cəsarətli bir qadının həyat hekayəsini nümunə göstərməklə onun fikirlərini, düşüncələrini, həyata baxışını dəyişəcəyi inamı üzərində qurulur, qadını dəyişərsə Elmirin də üzü gülər, xoşbəxt olar deyə Nəsrin onların yaşadığı mənzilin qonşuluğundakı evə köçür və hər gün ona tənha qadının mübarizələrindən, uğurlarından danışır. Axı Xəyalə həm də onun qızı Alenanın analığı idi. Alena Nəsrinin sevdiyi kişidən-Elmirdən qeyri-qanuni dünyaya gətirdiyi qızıdır. Elmir Xəyaləyə Alenanın sevdiyi qadın Nəsrinin ondan qeyri-qanuni yolla dünyaya gətirdiyi qızı olduğunu desə də, Xəyalə onu həyat yoldaşına olan sevgisinə görə doğma övladı kimi qəbul edir. Məhz elə qadının bu böyük ürəyinə görə Nəsrin onun həyatını dəyişməyə, xoşbəxt etməyə çalışır. Lakin Xəyalə yalnız hadisələrin son gedişatında bilir ki, sən demə, yazıçı Əminə kimi tanıdığı qadın Nəsrin Alenanın anası,həyat yoldaşının illərdir unutmadığı sevdiyi qadın imiş. Roman boyunca haqqında danışılan o təna qadının kimliyi naməlum olsa da, hadisələrin sonuna yaxın qadının kim olduğu məlum olur. Sən demə, yazıçınıın danışdığı hadisələr onun öz həyatı imiş. Yazıçının doğma qızını və sevdiyi kişini qorumaq cəhdi onu onu qaranlıqdan boylanan ay kimi təqdim edir oxuculara. Özü yanıb aləmi nura qərq edən günəş…Oxucuları intizarda saxlayan, həyəcanlandıran məqamlar sırasında gənc qızın ölümlə təhdid olunması, evdən qaçaraq küçələrdə gecələməsi, ailəsi tərəfindən ruhi xəstəxanaya salınması epizodları tükürpərdici səhnələrdəndir.
Romanın sonu da gözlənilməz hadisə ilə bitir, illərdir sevdiyi qadını, Nəsrini axtaran Elmir onunla fahişəxanada qarşılaşır. Romanın ən təsirli səhnələrindən biri Nəsrinin kitabın üzərində yazılmış 2 kəlməni Elmirə göstərməsidir, bir qadının kişiyə verdiyi həyat dərsi ürəyə toxunan 2 söz…

İnterPosta.info