Interposta.Info

Dövlət qurumu 228 minlik tenderdə qanunu heçə saydı

Paradoks
 22-10-2022, 11:55     1 036

Azərbaycan Meliorasiya və Su Təsərrüfatı Açıq Səhmdar Cəmiyyətinin Beyləqan Suvarma Sistemləri İdarəsi tender qaydalarını kobud şəkildə pozub.

"Qafqazinfo”nun əldə etdiyi məlumata görə, sözügedən qurum P-3 kanalının beton üzlüyünün üzərindəki qurğularla birlikdə əsaslı təmiri ilə bağlı elan etdiyi tenderə yekun vurub.

Tenderin qalibi "Topxana Layihə İnşaat” MMC olub. Tərəflər arasında 228 478.68 manatlıq sözləşmə imzalanıb.

Məsələ burasındadır ki, müsabiqənin qalibinin külli miqdarda vergi borcu var. Belə ki, "Topxana Layihə İnşaat” MMC-nin hazırkı vergi borcu 26 186.25 manat təşkil edir.

Bu isə qanun pozuntusu deməkdir. İş burasındadır ki, "Dövlət Satınalmaları haqqında” Qanunun 6.2.5-ci maddəsinin tələbləri vergi borcu olan şirkətlərin tenderdə iştirakını istisna edir.

Qeyd edək ki, Beyləqan Suvarma Sistemləri İdarəsinin rəisi Kərimov Azim Camal oğludur. Vergi borcu olan şirkətin isə qanuni təmsilçisi Bayramov Əli Kamal oğludur. Şirkət bu il 6 tenderin qalibi olub. Bu tenderlərin ümumi dəyəri iki milyon manatdan artıqdır.

Fotoda Azim Kərimov


Onu da əlavə edək ki, Azərbaycan Meliorasiya və Su Təsərrüfatı Açıq Səhmdar Cəmiyyətinin tərkibində olan idarələrin təşkil etdiyi tenderlərdə tez-tez bu kimi qanun pozuntularına rast gəlinir.

İnterPosta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26