Məktəblərdə yoluxma ilə bağlı vəziyyət necədir? (AÇIQLAMA)
"Epidemioloji vəziyyətlə əlaqədar olaraq paytaxt və region məktəblərində vəziyyət fərqlidir".
"İnterPosta" xəbər verir ki, bunu APA-ya açıqlamasında Təhsil Nazirliyinin Ümumi təhsilin təşkili və idarəolunması sektorunun müdiri Fuad Qarayev deyib.
Onun sözlərinə görə, son iki həftədə yoluxma sayında kəskin azalma müşahidə edilir. Bu səbəbdən şagirdlərin dərsə davamiyyəti əvvəlki dövrlərə nisbətən yaxşılaşıb:
"Hesab edirəm ki, yaxın zamanda yoluxma sayı o həddə çatacaq ki, tədris prosesində qırılmalar baş verməyəcək", - deyə o bildirib.
F.Qarayev təhsil işçilərinin vaksinasiyasından da danışıb. O qeyd edib ki, hər bir müəllim öz məsuliyyətini başa düşür:
"Müəllimlərimiz bilirlər ki, birmənalı şəkildə şagirdlərlə birbaşa ünsiyyətdədilər və cəmiyyətdə nümunəvi insandırlar. Ona görə də vaksinasiya prosesində aktiv iştirak edirlər", - deyə o əlavə edib.
İnterPosta.info
