Interposta.Info

Qazinin həyat yoldaşı Vəkillər Kollegiyasının sədrini müsahibəsindəki fikirlərinə görə məhkəməyə verdi

Müxtəlif
 5-07-2021, 16:53     271

“Hürriyyət”in ötən saylarında “Hüquq Bürosu” MMC-nin rəhbəri, hüquqi xidmət üzrə sahibkarlıq fəaliyyətiylə məşğul olan, Qarabağ müharibəsi əlilinin həyat yoldaşı Alıyeva Arzu İdayət qızının Vəkillər Kollegiyasından şikayətini dərc etmişdik. Arzu xanım hesab edir ki, ona qarşı qərəzli münasibət səbəbindən Vəkillər Kollegiyasına üzv ola bilmir.
Şifahi test imtahalarından 90 bal topladığını deyən Arzu Alıyevanın sözlərinə görə, 30 ilə yaxındır hüquqşünas kimi fəaliyyət göstərir. O, Qarabağ müharibəsi əlilinin həyat yoldaşı kimi, pozulmuş hüquqlarının bərpa edilməsi üçün Prezident İlham Əliyevə də müraciət edib.
Məsələylə bağlı Vəkillər Kollegiyasının sədri Anar Bağırov “Hürriyyət”in əməkdaşının suallarını belə cavablandırmışdı: “Mənim adımı bu məsələdə hallandırmayın. İmtahan qəbul edən şəxs deyiləm. Mənim o xanıma qarşı nə qərəzim ola bilər?! Yüzlərlə adam imtahan verir. Kəsilən də ola bilər. Arzu Alıyeva kollegiyadan xaric edilən zaman sədr mən deyildim. Onu heç tanımamışam. Arzu Alıyevaya qarşı heç bir qərəz göstərilməyib. Hər bir şəxs, eləcə də Arzu Alıyeva məhkəmə qaydasında müraciət edə bilər. Amma kiməsə qarşı şər-böhtan atmaq düzgün yol deyil. Hüquqşünas hüquqi vasitələrdən istifadə etməlidir, şər-böhtan vasitələrinə əl atmamalıdır”.
Yenidən redaksiyamıza müraciət edən Arzu Alıyeva Vəkillər Kollegiyasının sədri Anar Bağırovun "Hürriyyət"ə verdiyi müsahibəsində onunla bağlı ifadəsinə görə, eyni zamanda şərəf və ləyaqətini, eləcə də işgüzar nüfuzunu ləkələyən məlumata dair təkzib vermə və üzr istəmə öhdəliyinin qoyulmasıyla bağlı Nərimanov rayon məhkəməsinə müraciət edib:
"Mən ixtisasaca hüquqşünasam, bu sahədə təxminən 30 illik hüquqşünaslıq təcrübəsinə malikəm. “Hüquq burosu” MMC-nin təsisçisi və direktoruyam. “Azərbaycanda Qadın sahibkarlığının İnkişafı Assosiasiyası”nın, həmçinin “Azərbaycan Sahibkarlar Konfederasiyası”nın üzvüyəm. Hazırda hüquqi xidmət sahəsində sahibkarlıq fəaliyyəti ilə məşğulam.
Mən, 2009-cu ildə qanunsuz olaraq Vəkillər Kollegiyasından kənarlaşdırılmış və bundan sonra məhkəmələrdə nümayəndə kimi fəaliyyət göstərərək insanların hüquqlarını müdafiə etmişəm. Məlum olduğu kimi 2017-ci ildə Azərbaycan Respublikası Mülki Prosessual Məcəlləsinə dəyişiklik edildi və nümayəndəlik fəaliyyəti məhdudlaşdırıldı. Mən nümayəndə kimi fəaliyyət göstərən digər hüquqşünaslar kimi məhkəmə proseslərində iştirak edə bilmədim və sahibkar kimi fəaliyyətim demək olar ki, məhv olmaq dərəcəsinə çatdı. Mən məcbir olub Vəkillər Kollegiyasına qəbul olunmaq üçün sənədlərimi təqdim etdim. Şifahi test imtahanında 100 mümkün baldan 90 bal toplamağıma bağxmayaraq, eləcə də şifahi musahibədə bütün suallara cavab verməyimə baxmayaraq, xtisas komissiyasının üzvləri yazdılar ki, guya mən suallara cavab verə bilməmişəm. 30 illik məhkəmə təcrübəsi olan bir şəxsin “qətnamə nədir” sualına cavab verə bilməməsi ümumiyyətlə ağlasığan bir məsələ deyil, xüsusilə mənim timsalımda. Mən uzun illərdir ki, vəkilliyə və hakimliyə namizədləri test imtahanlarına hazırlayıram, həmin namizədlər test imtahanlarından yüksək bal toplayırlar və mən bununla qürur duyuram. Belə olan halda mənim “Məhkəmə qətnaməsi nədir sualına” cavab verə bilməməyim barədə verilən rəy mənə qarşı açıq-aşkar qərəzli münasibətin təzahürüdür.
Mən bu barədə “Hüriyyət qəzetində” məqalə dərc etdirmişdim. Azərbaycan Respublikası Vəkillər Kollegiyasının sədri Anar Bağırov mənim bu məqaləm barədə Hüriyyət qəzetinin jurnalistinə müsahibə verərək məni şər-böhtançı adlandırmış, şərəf və ləyaqətimə, işgüzar nüfuzuma ləkə gətirən bu məlumatı yayamış, məni mənəvi iztirablara məruz qoymuşdur. Daha dəqiq desəm, cavabdeh A.Bağırov məni əsassız olaraq cinayət törətməkdə ittiham etmiş və bu məlumat “Hürriyyət” qəzetinin 24-26 aprel 2021-ci il tarixli buraxılışında dərc edilmişdir. Həmin məlumatı olduğu kimi iddia ərizəsiə əlavə edirəm:
“Arzu Alıyevaya qarşı heç bir qərəz göstərilməyib. Hər bir şəxs, eləcə də Arzu Alıyeva məhkəmə qaydasında müraciət edə bilər. Amma kiməsə qarşı şər-böhtan atmaq düzgün yol deyil. Hüquqşünas hüquqi vasitələrdən istifadə etməlidir, şər-böhtan vasitələrinə əl atmamalıdır”
Azərbaycan Resbuplikası Cinayət Məcəlləsinin 147-ci maddəsi “Böhtan” adlanır və həmin maddədə deyilir ki, yalan olduğunu bilə-bilə, hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayış etdirildiyi halda internet informasiya ehtiyatında yayma cinayət əməli hesab edilir.
Azərbaycan Respublikası Mülki Məcəlləsinin 23.1-ci maddəsinin tələbinə əsasən fiziki şəxs onun şərəfini, ləyaqətini və ya işgüzar nüfuzunu ləkələyən, şəxsi və ailə həyatının sirrini və ya şəxsi toxunulmazlığını pozan məlumatların məhkəmə qaydasında təkzib olunmasını tələb edə bilər, bu şərtlə ki, həmin məlumatları yaymış şəxs onların həqiqətə uyğun oldığınu sübuta yetirməsin.
Həmin Məcəllənin 23.2-ci maddəsində deyilir ki, əgər fiziki şəxsin şərəfini, ləyaqətini, işgüzar nüfuzunu ləkələyən və ya şəxsi və ailə həyatının sirrinə qəsd edən məlumatlar kütləvi informasiya vasitələrində yayılmışdırsa, həmin kütləvi informasiya vasitələrində də təkzib edilməlidir.
Cavabdeh Bağırov Anar Ramiz oğlu məni şər-böhtan atmaqda təqsirləndirməklə mənim şərəf və ləyaqətimə, eləcə də işgüzar nüfuzuma ləkə gətirmişdir. O tək şərəf və ləyaqətə ləkə gətirən sözlər işlətməmiş, eyni zamanda məni cinayət törətməkdə ittiham etmişdir. Ona görə də cavabdeh A.Bağırov həqiqətə uyğun olmayan bu məlumatlar barədə təkzib verməli və üzr istəməlidir".
Qeyd edək ki, məhkəmə iyulun 13-də Nərimanov rayon məhkəməsində keçiriləcək.

İnterPosta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26