Interposta.Info

Zukerberqdən etiraf: "Rusiyanın müdaxiləsinə çox gec reaksiya verdik"

Dünya
 10-04-2018, 14:24     10 432

“Facebook”un yaradıcısı və rəhbəri Mark Zukerberq istifadəçilərin şəxsi məlumatlarından istifadə mövzusunda yazılı ifadəsini ABŞ Konqresinin Nümayəndələr Palatasının Ticarət və enerji üzrə Komitəsinə təqdim edib.
İKT.lent.az-ın xəbərinə görə, M. Zukerberq sabah – aprelin 11-də şəxsən Komitə üzvləri qarşısında çıxış edəcək və sualları cavablandıracaq.

“Biz sosial şəbəkədən zərər vurmaq məqsədilə istifadə olunmasının qarşısını almaq üçün kifayət qədər iş görməmişik”, - deyə “Facebook” rəhbəri etiraf edib. Söhbət seçkilərə xarici müdaxilə, yalan xəbərlərin yayılması, nifrətin qızışdırılması və informasiyaların qorunmasından gedir. M. Zukerberq bunu öz səhvi kimi qiymətləndirərək üzrxahlıq edib: “Biz Rusiyanın müdaxiləsini görməkdə və ona mane olmaqda çox yavaş hərəkət etdik. İşimizi yaxşılaşdırmaq üçün biz hazırda səylə çalışırıq”.

M. Zukerberq Rusiya müdaxiləsinin dərəcəsini tam aydınlaşdırmaq üçün ABŞ hökuməti ilə işləməyə davam etdiklərini söyləyib: “Biz bütün dünya üzrə nəinki seçkiləri qorumaq, həm də insanlara özünüifadə imkanı vermək və demokratiyanın gücü olmaq üçün bizdən asılı olan nə varsa, onu etməyə çalışırıq”.

Sosial şəbəkə rəhbəri hər iki qalmaqal - Rusiyanın ABŞ-dakı 2016-cı il prezident seçkilərinə müdaxiləsi və istifadəçi məlumatlarının sızması ilə bağlı ətraflı izahat verib. O qeyd edib ki, 2013-cü ildə tədqiqatçı Aleksandr Koqan xüsusi proqram əlavəsi yaradıb və onun vasitəsilə “Facebook” istifadəçilərinə sorğudan keçmək təklif olunub. Bu proqramı 300 min istifadəçi yükləyib və öz şəxsi məlumatlarından istifadə olunmasına icazə verib. A. Koqan həmin 300 min nəfərin dostluğundakı 10 milyon nəfərin də məlumatlarını toplayıb. 2014-cü ildə “Facebook” həmin proqram əlavəsinin istifadəçilərin dostlarının məlumatlarını toplamasını məhdudlaşdırıb. Bundan sonra A. Koqan əldə etdiyi məlumatları “Cambridge Analytica” konsaltinq firması ilə bölüşüb. Bu firma isə məlumatlardan siyasi texnologiya məqsədilə yararlanıb. Şirkət Donald Trampın seçki qərargahı ilə əməkdaşlıq edib.

Bundan sonra “Facebook” proqram əlavələrinin yalnız istifadəçilərin adına, fotosuna və elektron poçtuna əlçatanlığına icazə verəcək, eləcə də həmin əlavələri hazırlayan şirkətləri sosial şəbəkə ilə müqavilə imzalamağa məcbur edəcək.

Rusiya müdaxiləsindən danışan M. Zukerberq artıq ictimaiyyətə məlum olan faktları sadalayıb. Belə ki, “trol fabriki” kimi tanınan Rusiya internet Tədqiqatlar Agentliyi fake (saxta) akkauntlardan istifadə etməklə dezinformasiya kampaniyası aparıb. Ümumilikdə 2016-cı ildən bəri onlar 80 minə yaxın status paylaşıblar və bunu 126 milyon istifadəçi görüb. Həmin müddətdə agentlik “Facebook” və “Instagram”da cəmi 100 min dollar ödəməklə siyasi reklamlar yayıb və bunu 11 milyon amerikalı görüb. İndi “Facebook” yeni proqramlar hazırlayır ki, fake akkauntları avtomatik silsin. M. Zukerberq Fransadakı seçkilər ərəfəsində 30 min bu cür saxta profili sildiklərini nəzərə çatdırıb.

Bundan sonra siyasi reklamların yerləşdirilməsi üçün sifarişçinin avtorizasiyası – şəxsiyyətini təsdiq etməsi və harada olması barədə məlumat tələb olunacaq. Reklamlarda sifarişçinin adı açıq göstəriləcək.

interposta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26