Avropada ən əsəbi qadınların hansı ölkədə yaşadığı açıqlandı

Böyük Britaniyadakı qadınlar digər Avropa qadınlarına nisbətən daha çox qəzəb hiss edirlər. Bu nəticə Hologic Qlobal Qadın Sağlamlığı İndeksi çərçivəsində aparılan genişmiqyaslı beynəlxalq araşdırmada ortaya çıxıb. Araşdırma 76 mindən çox qadın və qızı əhatə edib.

Qaynarinfo xəbər verir ki, nəticələr barədə "The Independent" nəşri məlumat yayıb.

2024-cü ilin məlumatlarına görə, britaniyalı qadınların təxminən 1/4-i sorğudan əvvəlki gün qəzəb hiss etdiyini bildirib. Müqayisə üçün, Avropa üzrə orta göstərici 13% təşkil edib. Bundan əlavə, Böyük Britaniyada qadınlar arasında qəzəb səviyyəsi son bir ildə 47% artıb, halbuki əksər Avropa ölkələrində bu göstərici sabit qalıb.

Tədqiqatçılar bu tendensiyanı qadın sağlamlığının pisləşməsi və tibbi xidmətlərə çıxışla bağlı problemlərlə izah edirlər. Son reytinqdə Böyük Britaniya 142 ölkə arasında 41-ci yerdən 48-ci yerə enib və müşahidələr tarixində ən zəif nəticəni göstərib.

Britaniyalı qadınların təxminən 1/3-i mütəmadi olaraq fiziki ağrı yaşadığını bildirib ki, bu da araşdırmanın başladığı vaxtdan bəri ən yüksək göstəricidir. İştirakçıların təxminən 40%-i tibbi xidmətlərə çıxış çətinlikləri səbəbilə narahatlıq və məyusluq yaşadığını qeyd edib. Hər 10 qadından təxminən 7-si son 5 ildə Milli Səhiyyə Xidmətinə (NHS) müraciət zamanı gecikmələrlə qarşılaşdığını bildirib.

Araşdırma müəllifləri qeyd edirlər ki, səhiyyə xidmətlərinə çıxış problemləri qadınlara daha çox təsir edir. Britaniya səhiyyə sisteminin məlumatlarına görə, müayinə və müalicə növbəsində gözləyənlərin böyük hissəsini qadınlar təşkil edir. Xüsusilə ginekoloji xidmətlərdə növbələr ən uzun olan sahələrdən biri olaraq qalır.

Hologic Qlobal Qadın Sağlamlığı İndeksi hər il qadınların fiziki və psixoloji rifahını, eləcə də səhiyyə xidmətlərinə çıxış imkanlarını qiymətləndirir. Araşdırmada stress səviyyəsi, ağrı, emosional vəziyyət və profilaktik müayinələr kimi bir çox göstəricilər nəzərə alınır.

Goldmedia.az