Interposta.Info

Sabunçuda yaşayış massivləri su altında qala bilər

Müxtəlif
 30-01-2018, 11:04     10 532

"Paytaxtın Sabunçu rayonunun "Şuşa şəhərciyi" yaşayış massivində, "Savalan" massivində, "Daş karxanası" yaşayış massivində, həmçinin Maştağa qəsəbəsində bir neçə yerdə atmosfer yağıntılarının təsirindən qurunt sularının səviyyəsinin qalxması və ərazinin su ilə basılması müşahidə olunur".

Bu barədə Qaynarinfo-ya Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının dəstə rəisi Rafiq Həsənov məlumat verib. O, həmin ərazilərdə mərkəzləşmiş drenaj şəbəkəsinin olmaması və mövsümi yağışlar səbəbəbindən belə problemlərin yarandığını bildirib.

R. Həsənov həmçinin əlavə edib ki, Bakının digər yerlərində də sürüşmə aktivləşib:

"Bakının Xətai rayonundakı Zığ sürüşmə sahəsində, Abşeronun "Nübar" qəsəbəsində (El arasında "At yalı" adlanan yaşayış sahəsi) sürüşmə-çökmə ərazisində, Masazır qəsəbəsindəki "Zəli gölü" adlanan ərazidə sürüşmə prosesinin dinamikasında aktivlik müşahidə edilir. Zığda 2 il öncə sürüşmə zonasında olan evlər siyahıya alınıb. Orada da proses daimidir. Hətəm Allahverdiyev, Xanlar, İdris Süleymanov küçələri boyunca prosesin dinamikasında aktivlik var. O ki qaldı həmin ərazilərdən əhalinin köçürülməsinə, bu, bizim səlahiyyətimiz daxilində deyil, biz sadəcə ərazidə baş verən geoloji prosesləri öyrənirik.

Bayıldakı son vəziyyət barədə də məlumat verən qurum rəsmisi tədqiqat işlərinin davam etdirildiyini qeyd edib:

"Bayılda son günlər prosesin aktivləşməsi istiqamətində elə də ciddi bir dəyişiklik yoxdur. Bizim tərəfimizdən, Ekologiya və Təbii Sərvətlər Nazirliyi və digər aidiyəti dövlət qurumları tərəfindən ərazidə tədqiqat işləri aparılır. Hazırda biz yamacı yuxarısında qazıntı işləri görürük. Buruq qazıntı işlərindən sonra müəyyən rəy hazırlanacaq və müvafiq qurumlara təqdim olunacaq. Ondan sonra aidiyyəti qurumlar bununla bağlı tədbirlər görəcəklər".

interposta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26