“Bank of Baku” şəhid ailəsinin borcunu silinib - Rəsmi açıqlama

“Bank of Baku” aprel döyüşlərində şəhid olan Seymur Baxışovun ailəsinin kredit borcunu silib.

Bu barədə interposta.info-a bankdan məlumat verilib. Redaksiyamıza daxil olan məlumatda bildirilir ki, şəhidin atasının, həmçinin anasının da kredit borcları bağlanıb:

"Bildirmək istəyirik ki, Bank of Baku şəhidlərimizin və qəhrəmanlarımızın ailə üzvlərinə dəstəyini heç bir zaman əsirgəməyib. Belə ki, 4 dekabr 2015-ci il tarixində "Günəşli" neft yatağının 10 saylı dərin dəniz özülündə baş vermiş yanğın nəticəsində həyatını itirən və itkin düşən 11 nəfər nefçinin və aprel döyüşlərində şəhid olan əsgərlərin Bank of Baku-da mövcud olan bütün kredit borcları bankın rəhbərliyinin qərarı ilə bağışlanıb.

Xəbərlərdə adıçəkilən Baxışov Seymur Qulamhüseyn oğlunun şəhid olması haqqında xəbəri əldə etdikdən sonra onun Bank of Baku-da olan bütün kredit öhdəlikləri tamamilə silinib və borcunun bağışlanmasına dair məlumat ailəsinə təqdim olunub. Şəhidimiz Baxışov Seymur Qulamhüseyn oğlunun anası Baxışova Zenfira Həsən qızının bankımızda olan kreditlərinin bağışlanması barədə qərar qəbul olunub və tez bir zamanda icra olunacaq. Məlumat üçün bildirək ki, şəhidimizin atası Baxışov Qulamhüseyn İzzət oğlunun da Bankda olan kredit öhdəlikləri üzrə güzəştli şərtlər tətbiq edilmişdir və tamamilə bağlanmasına bank tərəfindən dəstək göstərilib.

Bankın əməkdaşının davranışına gəldikdə isə, bu məsələ ciddi araşdırılır və lazımi tədbirlər görüləcək".

Bankdan verilən məlumatda qeyd olunur ki, adıçəkilən şəhidimizlə yanaşı digər şəhid Orucov Müşviq Arif oğlunun anasının da kredit borcu silinib: "Bankın daimi müştəriləri sırasında olması xəbərini əldə etdikdən sonra, onun da kredit borcu Bank of Baku tərəfindən bağışlanıb".

interposta.info olaraq bildiririk ki, 23.03.2017-ci il (17:32 saat) tarixində yayımladığımız "Bank of Baku şəhid ailəsinə təzyiq edir - «Bizə görə ölməyib ki…»" yazı bu linkdədir: (https://interposta.info/nebz/16959-bank-of-baku-shid-ailsin-tzyiq-edir-biz-gor-olmyib-ki.html)

Sonda onuda bildiririk ki, "Bank of Baku"nun rəsmi nümayəndəsi tərəfindən saytımıza bildirilib ki, şəhid ailəsinin borcu tamamilə bağlanmışdır!

interposta.info