Rövşən Muradov: "Prezident İlham Əliyevin “Əl-Ərəbiyyə”yə müsahibəsində Azərbaycanın yeni geosiyasi reallıqları və sülh gündəliyi"

Azərbaycan uzun illər Ermənistanın işğalı altında qalan torpaqlarını 44 günlük Vətən müharibəsində azad edərək, həm beynəlxalq hüququ, həm də milli ləyaqətini bərpa etdi. Müharibədən sonra sülh prosesinin təşəbbüskarı məhz Azərbaycan oldu və Vaşinqtonda imzalanan sənəd iki ölkə arasında münasibətlərin yeni mərhələsini açdı. Bu sənədin əsas mahiyyəti tərəflərin bir-birinin ərazi bütövlüyünü tanıması və gələcək əlaqələrin bu prinsip əsasında qurulmasıdır. Ermənistan daxili siyasətində müəyyən qeyri-müəyyənliklər mövcud olsa da, imzalanmış razılaşmadan geri çəkilmək onların həm regional, həm də beynəlxalq mövqeyini zəiflədəcək.
Münaqişə dövründə etnik təmizləmələr, Xocalı soyqırımı və humanitar faciələr Azərbaycan cəmiyyətində dərin izlər buraxsa da, Azərbaycan qələbədən sonra intiqam yox, sülh yolunu seçdi. Hazırda “Böyük Qayıdış” Proqramı çərçivəsində məcburi köçkünlərin doğma yurdlarına qayıdışı təmin edilir, lakin mina təhlükəsi və dağıdılmış infrastruktur bərpa prosesini çətinləşdirir. Buna baxmayaraq, Azərbaycanın əsas məqsədi keçmiş məcburi köçkünlər üçün normal yaşayış şəraiti və iş imkanları yaratmaqdır.
Regionun gələcəyi üçün strateji layihələrdən biri Zəngəzur dəhlizi (TRIPP) və Araz dəhlizidir ki, bu da Azərbaycanın əsas hissəsini Naxçıvanla birləşdirəcək və beynəlxalq nəqliyyat əlaqələrini genişləndirəcək. Azərbaycan bu prosesdə İranla əməkdaşlığa xüsusi önəm verir və göstərir ki, dəhlizlər heç bir dövlət üçün təhlükə deyil, əksinə regional inteqrasiyaya xidmət edəcək. Bununla yanaşı, Azərbaycan Suriyada bərpa işlərinə dəstək verir, İsrail və Suriya arasında normallaşma prosesində vasitəçilik edir və sülhün tərəfdarı kimi çıxış edir.
Enerji sahəsində Azərbaycan Avropanın enerji təhlükəsizliyinə mühüm töhfə verir, eyni zamanda Körfəz ölkələri ilə bərpa olunan enerji layihələri reallaşdırır. Bununla paralel olaraq, İslam dünyasında həmrəyliyin tərəfdarı kimi çıxış edən Azərbaycan, şiə və sünnilərin birgə ibadəti, dini tolerantlıq və mədəniyyətlərarası dialoq təcrübəsi ilə nümunə göstərir. Türk Dövlətləri Təşkilatının güclənməsi isə Azərbaycanın xarici siyasət prioritetlərindəndir və bu birlik regionda yeni qlobal güc mərkəzinə çevrilmək potensialına malikdir.
Azərbaycanın balanslaşdırılmış xarici siyasəti və vasitəçilik səyləri ölkəni regional və qlobal hadisələrin mərkəzində saxlayır, ölkənin həm siyasi, həm də iqtisadi gücünü artıraraq gələcək inkişaf üçün geniş imkanlar açır.