Interposta.Info

Könül Nurullayeva: “18 oktyabr Müstəqilliyin Bərpası Gününü qalib xalq kimi qeyd etməkdən qürur duyuruq”

 

Siyasət / Manşet
 18-10-2022, 23:43     353

Son iki ildir, 2020-ci il 44 günlük Vətən müharibəsində qazandığımız böyük qələbə sayəsində 18 oktyabr Müstəqilliyin Bərpası Gününü öz ərazi bütövlüyümüzü bərpa etmiş qalib xalq kimi qeyd edirik və buna görə qürur duyuruq.
2020-ci ilin oktyabrın 18-də həm də Xudafərin körpüsü işğalçılardan azad edildi və bu tarixi məkanda üçrəngli bayrağımız ucaldı.
Azərbaycanın qələbəsi ilə başa çatan Vətən müharibəsindən 6 gün sonra – 2020-ci ilin noyabr ayının 16-da Prezident İlham Əliyev və birinci xanım Mehriban Əliyeva Xudafərinə səfər etdi, Müzəffər Ali Baş Komandan tarixi körpüdə şanlı Azərbaycan bayrağını qaldırdı.
Bu, Azərbaycan xalqı üçün əsl qürur idi.
Bütövlükdə götürdükdə Vətən müharibəsindəki tarixi qələbə, ölkəmizin suverenliyi, dövlət müstəqilliyi və milli kimliyi ilə bağlı rəmzi hadisələrə yenidən sistemli baxışı zəruri etdi. Bu səbəbdən, 28 may tarixinin Müstəqillik Günü, 18 oktyabrın isə Müstəqilliyin Bərpası Günü adlandırılması ilə bağlı qanun layihəsi Milli Məclisə təqdim olundu və müzakirələrdən sonra ali qanunverici orqan tərəfindən qəbul olundu.
Bu gün biz faktiki varisi olduğumuz Azərbaycan Xalq Cümhuriyyəti dövründəki milli sərhədlərimizin bərpasına nail olmuşuq. Ali Baş Komandan İlham Əliyevin də söylədiyi kimi, 1991-ci il oktyabrın 18-də müstəqillik bərpa edildi. Yeni düzəlişlər məhz bu uyğunsuzluğa son qoydu. Biz bu gün müstəqil ölkə olaraq Azərbaycan Xalq Cümhuriyyətinin varisiyik. Bizim üçün əsas müstəqillik bayramı 28 May günüdür, Azərbaycan Xalq Cümhuriyyətinin yaranması günüdür. Azərbaycanın Vətən müharibəsində tarixi ədaləti bərpa etməsi SSRİ dövründə süni şəkildə ortaya atılmış “Dağlıq Qarabağ” ifadəsinin siyasi leksikondan çıxarılması, tarixi torpaqlarımızda qurulmuş Ermənistan Respublikası ərazisindəki yaşayış məntəqələrinin Azərbaycanın milli toponimləri ilə təqdim olunması kimi vacib məsələləri də aktuallaşdırdı. Yeni inkişaf mərhələsində, həmçinin dövlətçilik tariximizdə müstəsna əhəmiyyətə malik tarixi günlərin mahiyyət və məzmun baxımından daha dəqiq təsbit olunmasına ehtiyac yarandı. 18 oktyabr Müstəqillik Günü adlandırılsa da, “Azərbaycan Respublikasının dövlət müstəqilliyi haqqında” Konstitusiya Aktının preambulası mahiyyət etibarilə müstəqilliyin bərpası ideyası üzərində qurulub. Azərbaycan Respublikası Ali Sovetinin 1991-ci il 30 avqust tarixində qəbul etdiyi müvafiq Bəyannamənin adı da "Azərbaycan Respublikasının dövlət müstəqilliyinin bərpası haqqında" adlanır. Yəni, “Azərbaycan Respublikasının dövlət müstəqilliyi haqqında” Konstitusiya Aktının məzmunu və başlığı arasında texniki uyğunsuzluğa yol verilib və nəticədə aktın adı “müstəqilliyin bərpası” əvəzinə, “müstəqillik aktı” kimi qəbul olunub. Tətbiq edilən düzəliş məhz bu uyğunsuzluğu aradan qaldırdı.
Beynəlxalq təcrübəyə də nəzər salsaq, bir çox ölkələrdə
milli dövlətin yarandığı gün "Respublika Günü" deyil, "Müstəqillik Günü" və ya “İstiqlaliyyət Günü” kimi qeyd edilir.
Bu düzəliş Azərbaycan Xalq Cümhuriyyəti və müasir Azərbaycan Respublikası arasında siyasi-hüquqi varisliyin daha dəqiq və qabarıq formada ifadə olunmasını təmin etdi. Bu, həmçinin ermənilərin “Azərbaycan Respublikasının dövlət müstəqilliyi haqqında” Konstitusiya Aktının adına istinad edərək, keçmiş Dağlıq Qarabağ Muxtar Vilayətinin heç vaxt müstəqil Azərbaycan Respublikasının tərkibində olmaması və Sovet qanunvericiliyinə uyğun olaraq 1991-ci il 2 sentyabr tarixli referendumla onun tərkibindən ayrılması barədə ortaya atdıqları iddiaları tam sıradan çıxarır. Vətən müharibəsindən sonra - 7 iyul 2021-ci tarixində Prezident sərəncamı ilə Qarabağ və Şərqi Zəngəzur iqtisadi zonalarının yaradılması 1921-ci il 7 iyul tarixindən etibarən istifadə edilən süni "Dağlıq Qarabağ" termini də artıq hüquqi və siyasi baxımdan ləğv olundu.
28 may tarixinin Müstəqillik Günü, 18 oktyabr tarixinin isə Müstəqilliyin Bərpası Günü kimi təsbit olunması Azərbaycanın dövlət suverenliyinin məhz 1918-ci ildə bərqərar olunması faktına əsaslanır. Bu, ərazi bütövlüyünü bərpa etmiş müasir Azərbaycanın 1918-ci ildə qurulmuş Azərbaycan Xalq Cümhuriyyətinin tamhüquqlu varisi olduğunu bir daha təsdiqləyir.

İnterPosta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26