“YENİ AZƏRBAYCAN PARTİYASI QƏLƏBƏLƏR PARTİYASIDIR.”

Bu günlərdə keçirilmiş Yeni Azərbaycan Partiyasının VII Qururltayında Partiyamızın Sədri cənab İlham Əliyevin nitqləri həm partiya və həm də dövlətçilik tarixi üçün çox böyük və önəmli əhəmiyyət kəsb edir. Möhtərəm Prezidentimiz cənab İlham Əliyevin parlaq giriş nitqində Yeni Azərbaycan Partiyasının yaradılmasını zəruri edən səbəblər, o dövr ölkədəki vəziyyətin xarakteristikası və dövlətçiliyimizin möhkəmləndirilməsi prosesində bu partiyanın aparıcılıq mövqeyinin əhəmiyyətli təhlili, ötən qurultaydan keçən dövr ərzində əldə edilmiş möhtəşəm qələbə və uğurların mexanizmi və dinamikası mühüm yer tutdu. Bir daha bildirildi ki, Ulu öndər Heydər Əliyevin parlaq siyasi zəkası və müdrik siyasəti, YAP-ın fəaliyyəti, məqsəd və məramı, onun xalqın inamını qazanması işi Azərbaycanın müasir dünyada xüsusi yerini müəyyən etdi, milli dövlətçiliyimizin bünövrəsini təşkil etdi, ona möhkəm zəmin yaratdı, yeni Azərbaycanı, onun bugünkü gerçəkliklərini müəyyənləşdirdi və gələcəyə aparan yolların uzunmüddətli planını verdi. Ölkəmiz demək olar ki, hər gün bir qalibiyyətlə ağır gərginlik burulğanını dəf edərək sabaha inamla baxmağa başladı. Bu inam artıq tam əminliklə dövlətçiliyimizin əbədi bərqərar olması üçün əsas şərt kimi möhkəm təminat idi.Yaradılarkən Yeni Azərbaycan Partiyasının Sədrliyində ümummilli lider Heydər Əliyevin olması, onun nurlu ideyalarının fəaliyyətin əsl mənbəyinə çevrilməsi cəmiyyətimizin siyasi cəhətdən aktiv hissəsini dövlətçiliyin müdafiəsi və yüksək inkişafı yoluna çıxartdı və səfərbər etdi. Ölkə Prezidenti, Partiyamızın Sədri cənab İlham Əliyev Qurultaydakı çıxışı zamanı demişdir: “Mən bugün bir daha o vaxt milli maraqları hər şeydən üstün tutan “91-lər”i qeyd etmək istəyirəm, onların fəaliyyətini yüksək qiymətləndirirəm. Bugün də onların bir çoxu bizim səramızdadır. Bundan sonra da onlar fəal işlərlə məşğul olacaqlar, Yeni Azərbaycan Partiyasının Veteranlar Şurasında fəaliyyət göstərəcəklər və ictimai həyatda fəaliyyət göstərəcəklər. Onları Azərbaycan xalqı unutmamalıdır.”
Partiya məfkurəsinin əsasını təşkil edən müstəqil dövlətçilik, azərbaycançılıq, qanunlara hörmətin və riayətin bərpası, vətəndaş həmrəyliyi və sosial ədalət prinsipləri YAP-ın qarşısında duran vəzifələrin həyata keçirilməsinin ideya təminatı olaraq bu gün Azərbaycanın siyasi gələcəyinin də ideya bazasını şərtləndirir, möhkəmləndirir. YAP-ın uğurlarının, qələbələrinin kökündə dayanan xalqa, xalqın maraqlarına və reallıqlara söykənməsi, arxalanmasıdır. Milli birliyin təmin edilməsi YAP –ın əsas məqsədidir. YAP fəaliyyəti dövründə möhtərəm Prezidentimiz, Partiyamızın Sədri cənab İlham Əliyevin ətrafında sıx birləşərək daim xalqımızın istək və arzularına müvafiq addım atmış, dövlətimizin inkişafına təkan olaraq yeniləşdirdiyi məram və məqsədi ilə, həqiqi öndərliyi ilə bütün xalq qarşısında ona layiq olduğunu dəfələrlə təsdiq etmişdir. “Qələbələr partiyası” olaraq qazandığı imic Yeni Azərbaycan Partiyasının dünəninə, bu gününə bələdçilik edir və gələcəyinə işıq tutur.
Ermənistan təxribatına cavab olaraq başlanmış Vətən müharibəsində əksər partiyaların vahid amal uğrunda cənab İlham Əliyevin ətrafında sıx birləşməsi Qələbəni tezləşdirən və az itki ilə yekunlaşdırmağa aparan əsas amil olmuşdur. Və bu möhtəşəm xalq iqtidar birliyi xalq - Ordu, Ali Baş Komandan –Ordu birliyini gücləndirdi və Qalibiyyəti təmin etdi. Möhtərəm Prezidentimiz cənab İlham Əliyevin “Biz birlikdə güclüyük!” fikri dövlət siyasətinin əsas uğur fəlsəfəsinə cevrilmiş, böyük Zəfər tarixi keçirilən milli həmrəylik siyasətini özündə ehtiva edərək ölkədə milli birliyi daha da möhkəmləndirmişdir. Qurultaydakı çıxışında cənab İlham Əliyev demişdir: “Bütün xalqımız bir yumruq kimi birləşərək düşmənə sarsıdıcı zərbələr vurub, öz tarixi torpaqlarımızı işğalçılardan azad edib. Biz bu tarixi missiyanı yerinə yetirdik.”
Yeni Azərbaycan Partiyasının VII Qurultayında 6 siyasi Partiyanın - Azərbaycan Xalq Demokratik Partiyası, Azərbaycan Kəndli Partiyası, Milli Qurtuluş Partiyası, Azərbaycan Yurddaş Partiyası, Azərbaycan Milli Hərəkat Partiyası və Azərbaycan Demokrat Sahibkarlar Partiyasının YAP-a qoşulmaq istəyi ilk növbədə iqtidarın atdığı bütün addımların, xüsusilə milli birlik və milli həmrəylik addımlarının doğruluğunu göstərir və xalqın ona olan inamının təsdiqi kimi dəyərləndirildi. Bildirildi ki, bu istək bir daha sübut edir ki, böyük xalq sevgisi qazanmış iqtidar partiyası olan YAP sözün əsl mənasında xalqın maraqlarını və iradəsini öz məqsəd və amalında birləşdirib xalqa xidmət missiyasını layiqincə yerinə yetirən əsl ümumxalq partiyasıdır. İkincisi, partiyaların YAP- a qoşulması prosesi böyük bir mərhələnin başlanğıcı olaraq qiymətləndirildi. Bildirildi ki, bu istək ilk qoşulma nümunəsi kimi siyasi partiyaların daha səmərəli və təsirli siyasi fəaliyyətinə zəmin və ölkəni yeni siyasi sisteminin formalaşması prosesinin təməli olacaqdır. Beləliklə, ölkəmizdə demokratik ənənələrə söykənən və həm də onu şaxələndirməyə xidmət edən qarşılıqlı dialoq üçün əlverişli mühitin daha da genişlənməsinə öz təsirini göstərəcəkdir. Üçüncüsü, bu, həm də siyasi proseslərə təsir etmək iqtidarında olmaq istəyən partiyalar üçün də daha əlverişli şərait yaradılmasına xidmət edəcəkdir.
Siyasi partiyaların YAP-a qoşulma təşəbbüsü xalqımızın bütün nümayəndələrinin ürəyincə oldu. Daim dövlətimizin daha da qüdrətlənməsi və möhkəmləndirilməsində var qüvvəsini əsirgəməyərək, bütöv Azərbaycan uğrunda, ən böyük dərdimiz Dağlıq Qarabağ probleminin həlli yolunda və Ermənistanın işğalı altında qalmış torpaqlarımızın geri alınması uğrunda böyük qələbələrə imza atmasında möhtərəm Prezidentimiz, Partiyamızın Sədri cənab İlham Əliyevə yaxından və sədaqətlə dəstəkçi olmağa çalışan biz bərdəlilər və YAP Bərdə rayon təşkilatının çoxminli üzvləri VII qurultayda digər partiyaların YAP-a qoşulmaq istəyinin reallaşmasının təsdiqini urəkdən bəyənir və bu qoşulma faktını ölkəmizdə dövlət və milli maraqlar naminə müxtəlif siyasi qüvvələrin inteqrasiya nümunəsi olaraq alqışlayırıq.

İnterPosta.info