YAP niyə bu dairələrdən namizəd irəli sürmədi? (SƏBƏB)
Dünən Yeni Azərbaycan Partiyasının (YAP) İdarə Heyəti 2020-ci il fevralın 9-da keçiriləcək növbədənkənar parlament seçkilərində partiyanın deputatlığa namizədlərini təsdiq edib.
"İnterPosta.info" Modern.az-a istinadla xəbər verir ki, YAP 125 seçki dairəsindən ikisində namizəd irəli sürməyib.
Belə ki, hakim partiyanın 3 saylı Babək-Kəngərli-Naxçıvan və 122 Xankəndi seçki dairələrindən namizədi yoxdur.
Qeyd edək ki, 3 saylı seçki dairəsinin beşinci çağırış Milli Məclisin deputatı Səttar Möhbalıyev olub. Səttar Möhbalıyev bitərəf deputat olduğundan yenə də həmin dairədən namizədliyini irəli sürüb.
Xankəndi seçki dairəsinin beşinci çağırış Milli Məclisin deputatı isə Flora Qasımova olub. Flora Qasımova 2020-ci il fevralın 9-da keçiriləcək seçkilərə qatılmaqdan imtina edib. Həmin dairədən namizədliyini Dağlıq Qarabağın Azərbaycanlı İcmasının sədri Tural Gəncəliyev irəli sürüb.
Ehtimallara görə, YAP-ın bu iki dairədən namizəd irəli sürməməsinin səbəbi məhz adını çəkdiyimiz şəxsləri müdafiə etməsi ilə bağlıdır. Hakim partiya ötən parlament seçkilərində də Səttar Möhbalıyevin və Zeynəb Xanlarovanın deputatlığa namizəd olduğu dairələrdən namizəd irəli sürməmişdi.
İnterPosta.info
Mövcüd problemlərinizi və təkliflərinizi bizə göndərə bilərsiniz. E-mail: [email protected] Telefon: (+994) 55 740 69 26
