Dağılan yol 150 milyon ayrılan yoldurmu? (AÇIQLAMA)

Bakı-Quba-Rusiya Federasiyası ilə dövlət sərhədi avtomobil yolunun 132 km-lik hissəsində çatlar və dağılmış hissələr yaranıb.

Xatırladaq ki, ötən il prezident İlham Əliyev Bakı-Quba-Rusiya Federasiyası ilə dövlət sərhədi yeni avtomobil yolunun tikintisinə 150 milyon manat ayırmışdı. Görəsən dağılan yol ötən il keyfiyyətlə tikilməsinə dair məlumat verilən 150 milyonluq yoldurmu?

Məsələ ilə bağlı "İnterPosta.info"ya açıqlama verən AAYDA-nın İctimaiyyətlə Əlaqələr şöbəsinin rəisi Anar Nəcəfli sözügedən iki yolun bir-birilə əlaqəsi olmadığını bildirdi:

"Bakı-Quba-Rusiya Federasiyası ilə dövlət sərhədində çəkilən yol yeni yoldur. Həmin yolun hazırda dağıntılar yaranmış Bakı-Gəndob yolu ilə əlaqəsi yoxdur. O zaman verilən məlumat Rusiya istiqamətində hərəkət edəcək avtomobillər üçün çəkiləcək yol idi, bu yol isə Bakı-Quba-Rusiya yolunun Bakı-Gəndob hissəsini əhatə edir".

Qeyd edək ki, AAYDA artıq 100 ildir ki, fəaliyyət göstərir. Bu gün Bakı-Gəndob yolunun dağılmasına səbəb kimi isə yolun inşası zamanı yol verilən konstruktiv səhvləri göstərir.

Bu gün AAYDA-nın yaydığı məlumatda qeyd olunur ki, yolda çatların əmələ gəlməsi və bir hissəsinin dağılması haqlı olaraq vətəndaşlar tərəfindən narazılıqla qarşılanır, avtonəqliyyat vasitələrinin təhlükəsiz hərəkətində problemlərə gətirib çıxarır. AAYDA-nın rəhbərliyinin müdaxiləsi ilə sözügedən yol boyu təxirəsalmaz və kompleks tədbirlərə start verilib.

Təmir-bərpa işləri yolun Şabran rayonu ərazisindən başlayaraq Siyəzən və Xızı rayonlarını keçməklə Bakı şəhəri istiqamətində aparılır.

İnterPosta.info