Azərkosmosun sədr müavini Dunay Bədirxanov gənc kosmik lider seçilib FOTO

Rəqəmsal İnkişaf və Nəqliyyat Nazirliyinin tabeliyində fəaliyyət göstərən Azərbaycan Respublikası Kosmik Agentliyi – Azərkosmosun idarə heyətinin sədr müavini Dunay Bədirxanov Beynəlxalq Astronavtika Federasiyasının “Gənc kosmik liderlərin tanıtım proqramı”nın (Young Space Leaders Recognition Program) dünya üzrə səkkiz üzvündən biri seçilib.

Proqram üzvləri akademik karyeralarında kosmik sahə üzrə müstəsna töhfələri olan gənclər arasından seçilir. Həmin liderlər, həmçinin tələbə və gənc mütəxəssislərə öz bilik və təcrübəsini ötürür, beynəlxalq kosmik sahədə fəaliyyətləri ilə fərqlənirlər.

Azərbaycan təmsilçisi ilə yanaşı, ABŞ-ın “Virgin Galactic” şirkətinin hökumət və tədqiqat işləri üzrə vitse-prezidenti Sirişa Bandla, Türkiyənin “DeltaV Space Technologies Inc.” şirkətinin baş mühəndisi Ozan Kara, Kanada Kosmik Agentliyinin üzvü Mariam Naseem, Lüksemburq Universitetinin kosmik qanun üzrə doktorantı Antonino Salmeri, Kosmik hüquq və siyasət üzrə müstəqil ekspert Ruvimbo Samanqa, “Dünya Kosmos Həftəsi” layihəsinin rəhbəri Maruska Strah və “Kosmik Nəsil Məsləhət Şurası”nın sədri Antoni Yuen gənc kosmik liderlər sırasındadır.

“Gənc kosmik liderlərin tanıtım proqramı”nın əsas məqsədi seçilmiş liderlərin ictimaiyyət arasında kosmosa dair təbliğat işləri aparması, Beynəlxalq Astronavtika Federasiyasının komitələrinin işinə töhfə verməsində birbaşa iştirak etməkdir. Eyni zamanda həmin gənclərin beynəlxalq plenar iclas və kosmos sahəsinə aid qlobal tədbirlərə fəal şəkildə qatılmalarına, bilik və təcrübə mübadiləsinə dəstək veriləcək.

Qeyd edək ki, Dunay Bədirxanov artıq 11 ildən çoxdur ki, Azərkosmosda çalışır. O, 2023-cü ildə Bakıda keçiriləcək Beynəlxalq Astronavtika Konqresi üzrə Beynəlxalq Proqram Komitəsinin həmsədridir. Dunay Bədirxanov əmək fəaliyyəti dövründə Azərbaycanın “Azerspace-1” və “Azerspace-2” peyklərinin orbitə çıxarılması üzrə məsul vəzifələrdə, o cümlədən “Azerspace-2” peyk layihəsinin proqram meneceri olub.
Azərbaycan federasiyasının “Tanıtım” proqramında təmsil olunması ölkədə kosmos sahəsində fəaliyyət göstərən və marağı olan gənclər üçün uğurlu yol açacaq.

“Gənc kosmik liderlərin tanıtım proqramı” və üzvlər haqqında daha ətraflı məlumatı aşağıdakı keçiddən əldə edə bilərsiniz:

https://www.iafastro.org/news/the-2021-iaf-young-space-leaders.html

Xatırladaq ki, artıq 71 ildir fəaliyyət göstərən Beynəlxalq Astronavtika Federasiyasının 72 ölkədən 433 üzvü var. Azərbaycan Respublikasının Kosmik Agentliyi – Azərkosmos 2018-ci ildən federasiyanın fəal üzvüdür və 2023-cü ildə Bakı şəhəri kosmik sahənin ən böyük tədbiri olan Beynəlxalq Astronavtika Konqresinə ev sahibliyi edəcək.

Azərkosmos haqqında

Cənubi Qafqazda ilk və yeganə peyk operatoru olan Azərkosmos telekommunikasiya və coğrafi kəşfiyyat sahələri üçün yüksək keyfiyyətli peyk xidmətləri təqdim edir. 2013-cü ilin fevral ayında orbitə buraxılan və Azərkosmos tərəfindən idarə edilən “Azerspace-1” peyki 46° şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir. Ən azı 15 il müddətində orbitdə fəaliyyət göstərəcək peykin faydalı yükü 36 transponderdən ibarətdir: C diapazonda 24, Ku diapazonda 12 transponder. 2014-cü ilin dekabr ayından etibarən Azərkosmos sayca ikinci, təyinatına görə yüksək ayırdetməli (1,5 m ayırdetmə) Yer səthinin məsafədən müşahidə peyki olan “Azersky”ın idarəçiliyini təhvil almış və bununla da geoinformasiya xidmətləri də daxil olmaqla Yer səthinin məsafədən müşahidəsinin kommersiya fəaliyyətinə başlamışdır. Şirkətin strateji inkişaf planlarına əhatə dairəsinin və xidmətlər spektrinin genişləndirilməsi daxildir. Bu məqsədlə Azərkosmos 2018-ci ildə ikinci telekommunikasiya peyki “Azerspace-2”ni 45° şərq uzunluğu orbital mövqeyinə çıxarıb. Daha ətraflı məlumatı www.azercosmos.com internet səhifəsindən ala bilərsiniz.

İnterPosta.info