MTN generallarının yağmaladığı,

Adı qalmaqallardan əskik olmayan 8-ci kilometr bazarının yeni sahibləri icarə haqlarını qaldırıblar...

Uzun müddətdir ki, 8-ci kilometr (“vosmoy”) bazarı ətrafında yaranan “düyün” açılmamış qalır. Bazar üstündə hələ də dava gedir. Məsələ ilə bağlı son gəlişmələr barəsində ötən sayımızda geniş məlumat vermişik. Məlum olduğu kimi “MTN-işi”nə dair məhkəmə prosesi hazırda 8-ci kilometr epizodu üzrə davam edir. Məhkəmə şahid qismində bazarın keçmiş sahibi Çingiz Əsədov və MTN-in nazir müavini general Hilal Əsədovun arvadı Nüşabə Əsədova dindirilib. Onların ifadələrindən belə aydın olur ki, bazarla bağlı yaşanan qalmaqal, hələ bir müddət də davam edəcək.

Hilal Əsədov məhkəmə iclasında bazarı necə ələ keçirdiklərini detallı şəkildə danışıb.

Məsələnin aktuallığını nəzərə alıb, sözgedən bazara yollandıq. Oradakı hazırkı vəziyyətlə tanış olub, satıcılarla söhbət etdiyimiz zaman bir sıra maraqlı məqamların şahidi olduq.

İlk olaraq onu qeyd edək ki, 8-ci kilometr bazarı Bakıda ilk topdansatış yerlərindən biridir. Elə buna görə də bazarda hər zaman satılan məhsulların qiyməti digər yerlərlə müqayisədə ucuz olub. Məhz bu faktor da Nizami rayonu ərazisində yerləşən bu bazarı insanlar arasında məşhurlaşdırıb. Nəticədə bazarın adı bir növ brendləşib. Burada xeyli sayda alıcıya rast gəlmək mümkündür. Görünür bir, zamanlar bazarı MTN generallarına cazibədar göstərən səbəb də elə bu məkanın alıcı sarıdan heç zaman korluq çəkməməsi olub...

Öyrəndik ki, 1 hektardan artıq ərazini əhatə edən, 3-hissədən ibarət olan bazarda son zamanlar yer haqları qaldırılıb. Məhz bu faktor da satıcıların narazılığına səbəb olub. Satıcılar bildirirlər ki, yer pulu qalxdığı üçün onlar da məhsulu bahalaşdırmağa məcbur olurlar. Belə olan halda isə müştərilərini itirirlər.

8-ci kilometr bazarında hər bir məhsula rast gəlmək mümkündür. Kiçik piştaxtalar üzərində satılan ərzaq məhsulları, mağazalarda satılan geyimlərdən başqa, burada kafelər də fəaliyyət göstərir. Hazırda isə bazarda demək olar ki, boş yer tapmaq mümkün deyil. Satıcılar bildirdilər ki, icarəyə yer götürmək üçün bazar rəhbərliyinə qış aylarında müraciət etmək lazım gəlir. Qış aylarında alver zəif olduğu üçün bəzi satıcılar yeri yalnız isti aylar üçün bron edirlər.

Burada hər bölməyə bazar rəhbərliyinin təyin etdiyi bir nəfər nəzarət edir. Bütün yer pulu, yerlərin bölüşdürülməsi məsələsinə də həmin şəxs baxır. Hazırda bazarda yerindən asılı olaraq piştaxtaların icarə haqqı günlük 15-30 manat arasında dəyişir. Anbarların icarə haqqı isə aylıq 1000-1200 manat arasındadır. Əvvəllər bu qiymətlərin 200-300 manat olduğu bildirildi. Söhbət etdiyimiz əksər satıcılar bazarın generallar tərəfindən öz sahiblərindən alınmasından xəbərdar olduqlarını vurğuladılar. Satıcılar söylədilər ki, bazarda bəzi piştaxtaları günlük, bəzilərini isə aylıq icarə haqqı ilə verirlər. Satıcı Vüsal bildirdi ki, bibər satmaq üçün 1.5 metr uzunu, 1 metr isə eni olan piştaxtanı gününə 15 manat verməklə icarəyə götürüb:

“Əvvəllər icarə haqqı ucuz idi. Belə piştaxtanı 8-10 manata götürürdük. Ancaq bu ildən etibarən qiymətlər qaldırılıb. Bu da təbii ki, heç kimin ürəyincə deyil. Hələ mənim götürdüyüm yer kiçikdir və bazarın axırına yaxın yerdədir. Yola yaxın və ortada yerləşən bu cür piştaxtaların icarəsi bir gün üçün 20-25 manatadır”.

Bazarda meyvələrin satıldığı yerdə isə piştaxtalar daha çox bir aylıq icarəyə verilir. Burada da ölçüsündən asılı olaraq, icarə haqları fərqlidir. Öydəndik ki, bazarın ümumi xalis gəliri bir ay üçün 200 min manata yaxındır. Satıcılar bildirdilər ki, icarə haqqı baha olduğu üçün məhsulları da məcbur olub, ötən illərlə müqayisədə baha satırlar.

Onu da qeyd edək ki, aylıq gəliri 200 min manat olan bazarda heç də gigiyenik qaydalara əməl olunmur. Bazarın üstü dəmir olduğu üçün günün istisində içəridə havasızlıqdan dayanmaq çox çətindir. Xüsusilə də ağartı və ət məhsullarının satıldığı yerdə pis qoxu səbəbindən dayanmaq olmur. Bazarın ventilyasiya sistemi də mövcud deyil. Dəfələrlə burada leş və murdar ətlərin satılması barədə mətbuatda yayılan məlumatlar onu da deməyə əsas verir ki, bazarda məhsulların keyfiyyətinə nəzarət edən yoxdur.

Həmçinin bazar ətrafında səkilərdə, yol kənarında qalaqlanan zibilliklər də təmizlənmir. Ən acınacaqlısı isə odur ki, bu zibilliklərin yanında açıq formada müxtəlif növ ərzaqların satışı həyata keçirilir./musavat.com

interposta.info