Interposta.Info

İsraildəki “Avroviziya”ya dörd şəhər namizəddir

Maqazin
 21-06-2018, 16:59     10 447

2019-cu ilin may ayında İsraildə keçiriləcək “Avroviziya” mahnı müsabiqəsinə ilkin maraq göstərən ölkələrin sayı 18-ə çatıb. Novator.az bildirir ki, iyunun 21-dək Almaniya, Bolqarıstan, Çexiya, Danimarka, Estoniya, Finlandiya, Fransa, Xorvatiya, İspaniya, İsveç, İsveçrə, Kipr, Malta, Norveç, Polşa, San Marino, Serbiya, Ukrayna “Avroviziya 2019”da iştiraka hazır olduqlarını açıqlayıblar.

İctimai teleradioları cəmləşdirən Avropa Yayım Birliyinin 1956-cı ildən keçirdiyi “Avroviziya” yarışının qaydaları qalibə növbəti müsabiqəni təşkil etmək hüququ verir. Portuqaliyanın paytaxtı Lissabonun ev sahibliyi etdiyi “Avroviziya 2018”də israilli müğənni Netta Barzilay qələbə çalıb.

İsrail hökuməti “Avroviziya 2019” üçün dörd şəhəri namizəd göstərib: Yerusəlim, Tel-Əviv, Hayfa, Eylat. Son qərar sentyabr ayında veriləcək.

Yerusəlim (Qüds) işğal olunmuş şəhər sayıldığı üçün müsabiqənin orada keçirilməsi kütləvi boykota səbəb ola bilər. Çox ölkənin gözləmə mövqeyi tutması da bununla bağlıdır.

Azərbaycan “Avroviziya” musiqi yarışına 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü yeri tutub.

“Avroviziya 2018”də təmsilçi Aysel Məmmədova yarımfinalda ələnib.

interposta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26