Interposta.Info

 

Rüşvətə görə həbs edilən dörd vəzifəli şəxs ev dustaqlığına buraxılıb

Gündəm
 27-11-2023, 20:33     26 265

Rüşvət almaqda təqsirləndirilən 19 vəzifəli şəxsin cinayət işi üzrə növbəti məhkəmə prosesi keçirilib.
APA xəbər verir ki, Bakı Ağır Cinayətlər Məhkəməsində hakim Şəlalə Həsənovanın sədrliyi ilə keçirilən iclasda təqsirləndirlən şəxslərin vəkilləri vəsatətlə çıxış edib.
Təqsirləndirilən Əmlak Məsələləri Xidməti Lənkəran ərazi şöbəsinin keçmiş müdiri Pərviz Ələkbərov, Xaçmaz ərazi şöbəsinə rəhbərlik etmiş Aydın Cəfərov, Qazax şöbəsinin müdiri olmuş Ehtiram Eyvazov və Şəki rayon Qoxmuq bələdiyyəsinin keçmiş sədri Etibar Eyvazovun vəkilləri həbs qətimkan tədbirlərinin həbslə olmayan başqa qətimkan tədbiri ilə əvəz olunması ilə bağlı vəsatət qaldırıb.
Məhkəmə vəsatəti təmin edib, təqsirləndirilən dörd nəfər ev dustaqlığına buraxılıb.
İş üzrə digər təqsirləndirilənlərdən xidmətin sektor müdiri İldırım Məmmədov və xidmətin Şirvan şöbəsinin sabiq müdiri Nazim Səfərov həbsdədir və onların məhkəmə prosesi davam edir.
Digər təqsirləndirilən 13 nəfər barəsində istintaq və məhkəmə dövrü üçün polis nəzarətinə vermə, başqa yerə getməməyə dair iltizam kimi alternativ qətimkan tədbirləri seçilib.
Təqsirləndirilən şəxslərə Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrarən külli miqdarda rüşvət alma), 312-1 (vəzifəli şəxsin qərarına qanunsuz təsir göstərmə (nüfuz alveri) və digər maddələri ilə ittiham edilir.

InterPosta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26