Azərbaycan-Pakistan strateji tərəfdaşlığı: Müasir çağırışlar və yeni hədəflər

Müstəqillik illərindən başlayaraq böyük tərəqqi yolu keçən və 44 günlük Vətən müharibəsində qələbə qazanan Azərbaycan həyata keçirdiyi xarici siyasətlə özünün beynəlxalq münasibətlərini və diplomatik əlaqələrini də uğurla inkişaf etdirir. Bu gün ölkəmiz dünyada Cənubi Qafqazın lider ölkəsi kimi tanınmaqla beynəlxalq arenada da etibarlı tərəfdaş dövlət kimi qəbul edilir. Qarşılıqlı etimada əsaslanan sıx münasibətlər, Prezident İlham Əliyevin dünya ölkələrinə səfərləri, regional və beynəlxalq tədbirlərdəki iştirakı, imzalanan mühüm sənədlər, ikitərəfli və çoxtərəfli münasibətlərin dinamik inkişafına öz müsbət təsirini göstərir.

Hazırkı dövrdə dövlət başçımızın həyata keçirdiyi siyasət ölkəmizlə dünya dövlətləri arasında münasibətləri daha da sıxlaşdırır, nəticədə həm siyasi-iqtisadi, həm də sosial-mədəni münasibətlər sistemində uğurlar əldə olunur.

Dünyanın bir çox ölkələri ilə yanaşı, Azərbaycanla Pakistan arasında əlaqələr də yüksələn bir xətlə inkişafdadır. Belə ki, iki ölkə arasında möhkəm dostluq və strateji tərəfdaşlıq münasibətləri tarixən formalaşıb və bu əlaqələr ildən-ilə daha da güclənir. Pakistan Azərbaycanın müstəqilliyini tanıyan ilk ölkələrdən biri olmaqla bu günə qədər beynəlxalq platformalarda ölkəmizin suverenliyini və ərazi bütövlüyünü qətiyyətlə müdafiə edibdir. Eyni zamanda, Pakistan Ermənistanı rəsmi olaraq tanımamış və Azərbaycanla qardaşlıq münasibətlərinə həmişə sadiq qalmışdır.

Bu gün də ölkələrimiz həm ikitərəfli, həm də çoxtərəfli münasibətlərdə bir-birinə dəstək olmaqla bütün sahələrdə əlaqələri inkişaf etdirirlər. Dövlətlərimizin münasibətlərinə nəzər salanda görürük ki, Pakistan Azərbaycanın müstəqilliyini tanıyan, onunla diplomatik əlaqələr yaradan və Azərbaycanda səfirliyini açan ilk müsəlman dövlətlərindən biridir. Nelə ki, Pakistanın Bakı şəhərində, Azərbaycanın isə İslamabad da daimi nümayəndəlikləri açılmışdır. Hər iki ölkə arasındakı əlaqələr siyasi, iqtisadi, təhlükəsizlik, mədəniyyət, müdafiə və digər sahələri əhatə edir. Hərbi, hərbi-texniki, hərbi-təhsil və digər sahələrdə əməkdaşlıq isə xalqlarımız arasında ənənəvi dostluq və qarşılıqlı etimadın bariz nümunəsidir.

1995-ci ilin oktyabrında Pakistan Prezidentinin Azərbaycana rəsmi səfəri çərçivəsində ölkələrimiz arasında bir sıra sənədlər o cümlədən, Azərbaycan Respublikası Hökuməti ilə Pakistan İslam Respublikası Hökuməti arasında Azərbaycan-Pakistan Birgə Komissiyasının yaradılması haqqında Protokol və “Azərbaycan Respublikası və Pakistan İslam Respublikası arasında Əməkdaşlıq haqqında Müqavilə” imzalanmışdır. 1996-cı ilin aprel ayında isə Ümummilli Lider Heydər Əliyev Pakistanda rəsmi səfərdə olmuşdur. Bu rəsmi səfərlər iki ölkə arasında münasibətlərin inkişafına xüsusi təkan vermişdir.

Pakistan daim Ermənistanın Azərbaycana qarşı hərbi təcavüzünü pisləmiş, Ermənistanı bir təcavüzkar kimi ittiham etmişdir. Xatıqlamaq yerinə düşər ki, 1993-cü il aprelin 30-da Ermənistan-Azərbaycan münaqişəsi ilə bağlı BMT TŞ-nin 822 saylı qətnaməsinin qəbul edildiyi iclasa da Pakistan sədrlik etmişdir.

Hazırda Ulu Öndərin siyasi kursunu uğurla davam etdirən Prezident İlham Əliyev Pakistanla münasibətlərin daim inkişaf etdirilməsinə diqqətlə yanaşır. Ölkələrimiz arasında mövcud ikitərəfli münasibətlər iqtisadi və ticari sahələrində də öz əksini tapır. Belə ki, Azərbaycan Pakistana müxtəlif sahələrdə, xüsusilə infrastruktur və energetika sektoruna 2 milyard dollarlıq sərmayə yatırmağa hazır olduğunu bəyan edib. Bu məqsədlə hər iki ölkə ticarət dövriyyəsini artırmaq, investisiya imkanlarını genişləndirmək və birgə iqtisadi layihələri sürətləndirmək məqsədilə konkret addımlar atır. Xüsusilə, SOCAR və Pakistanın aparıcı şirkətləri arasında enerji sahəsində əməkdaşlığa dair yeni müqavilələr imzalanıb ki, bu da gələcəkdə iki ölkə arasında strateji tərəfdaşlığı daha da möhkəmləndirəcəkdir.

Müdafiə və təhlükəsizlik sahəsində də dövlətlərimizin əməkdaşlığı davam edir. Azərbaycan artıq Pakistanın müdafiə sənayesi məhsullarını alır və onların yüksək keyfiyyətindən razılığını bildirir. Bununla yanaşı, tərəflər birgə müdafiə sənayesi müəssisələrinin yaradılmasını və hərbi-texniki əməkdaşlığı da daha da genişləndirməyi planlaşdırırlar.

Ölkələrimiz arasında iqtisadi və təhlükəsizlik sahəsində olan əməkdaşlıq nəqliyyat və logistika sektorunda da öz əksini tapır. Azərbaycanın beynəlxalq nəqliyyat dəhlizlərində tutduğu mövqe Pakistan üçün yeni tranzit imkanlarını yaratmaqla bərabər, həm də onun yükdaşıma qabiliyyətinin artırılmasına da öz töhfəsini verəcəkdir. Xüsusilə də, Şimal-Cənub və Şərq-Qərb nəqliyyat dəhlizlərində ölkələrimizin iştirak etdiyi birgə layihələr bu əməkdaşlığın daha da dərinləşəcəyindən xəbər verir.

Bu sahələrdəki əməkdaşlıq isə öz növbəsində humanitar və mədəni əlaqələrin də inkişafına gətirib çıxarmışdır. Turizm, təhsil və mədəniyyət sahələrində birgə layihələrin həyata keçirilməsi və yaxın gələcəkdə Pakistanın ölkəmizin işğaldan azad olunmuş ərazilərində bərpa işlərində iştirakı da planlaşdırılır. Butün bunlar isə ölkələrimizi bir-birinə yaxınlaşdırır və xalqlarımız arasında dostluğu daha da gücləndirir.

Azərbaycan və Pakistan arasında əlaqələrin daha da möhkəmlənməsində parlamentarilərin və hökümət üzvlərinin qarşılıqlı rəsmi səfərləri də mühüm rol oynayır. Belə ki, iki ölkənin hökumət və parlament üzvləri arasında mütəmadi işgüzar görüşlərin keçirilməsi, strateji sahələr üzrə yeni təşəbbüslərin irəli sürülməsi və qarşılıqlı maraqlara əsaslanan tədbirlərin təşkili tarixən qurulan əlaqələrimizi daha da genişləndirilir.

Beləliklə, bu gün əminliklə deyə bilərik ki, Azərbaycan-Pakistan münasibətləri hər iki ölkənin dövlət başçılarının səyləri nəticəsində özünün ən yüksək inkişaf dövrünü yaşayır.

Milli Məclisin deputatı Rövşən Muradov

İnterPosta.info