Interposta.Info

 

Öcal Oğuz: “Beynəlxalq Türk Dili Günü noyabrda elan oluna bilər”

Ölkə
 8-04-2023, 14:52     119

"BMT-nin Təhsil, Elm və Mədəniyyət Təşkilatının (UNESCO) bu ilin noyabrında Parisdə keçiriləcək 42-ci Baş Konfransında Beynəlxalq Türk Dili Gününün təsdiq ediləcəyi gözlənilir".

Bunu "Report"a UNESCO-da Türkiyə üzrə Milli Komissiyanın rəhbəri Öcal Oğuz deyib.

"Əslində bu, sadə, lakin kifayət qədər uzun davam edən prosesdir. UNESCO-nun qaydalarına əsasən, ilk növbədə, birgə qərar layihəsi hazırlanmalıdır. Bunun üçün həm türk dövlətlərinin milli komissiyaları, həm də onların xarici işlər nazirlikləri və UNESCO-dakı daimi nümayəndələri ilə koordinasiyalı iş aparılmalıdır. Biz bu prosesə 2017-ci ildə Türkiyədə başladıq, sonra türk dövlətlərinin milli komissiyalarını dəvət etdik və bir neçə görüş keçirdik", - deyə o bildirib.
Öcal Oğuz əlavə edib ki, TÜRKSOY-a üzv ölkələrin hər birində milli dil günü var, lakin ortaq gün yoxdur. Bunun üçün 15 dekabr tarixinin seçilməsi təsadüfi deyil. "Türk xalqlarının qədim əlifbası olan run əlifbası məhz dekabrın 15-də deşifrə edilib və bu barədə beynəlxalq ictimaiyyətə məlumat verilib", - deyə UNESCO-da Türkiyə üzrə Milli Komissiyanın rəhbəri bildirib.

O, aprelin sonunda qətnamənin UNESCO-nun Baş Direktorluğuna təqdim ediləcəyini, may ayında qurumun İcraiyyə Komitəsi ilə görüşün planlaşdırıldığını, bu ilin noyabrında Parisdə keçiriləcək 42-ci Baş Konfransda isə 15 dekabr tarixinin Beynəlxalq Türk Dili Günü elan edilməsinin gözlənildiyini vurğulayıb.

İnterPosta.info

Mövcüd problemlərinizi və təkliflərinizi bizə göndərə bilərsiniz.
E-mail: [email protected]
Telefon: (+994) 55 740 69 26